நீங்கள் தேடியது "கைதி தப்பி ஓட்டம்"

விழுப்புரம்:

ஆந்திர மாநிலம் விசாகப்பட்டினம் பகுதியை சேர்ந்தவர் பலம் அர்ஜூணன்( வயது27). இவர் கேரளாவில் கஞ்சா விற்று வந்தார். இது குறித்து கேரள போலீசார் வழக்கு பதிவு செய்து பலம் அர்ஜூணனை கைது செய்தனர்.

பலம் அர்ஜூணன் மீது ஆந்திர மாநில போலீஸ் நிலையத்திலும் பல வழக்குகள் நிலுவையில் உள்ளது.

அந்த வழக்குகள் தொடர்பாக பலம் அர்ஜூணனிடம் விசாரணை நடத்த ஆந்திர மாநில போலீசார் முடிவு செய்தனர்.

அதன் பேரில் அவரை ஆந்திர போலீசாரிடம் ஒப்படைப்பதற்காக கேரள போலீசார் 4 பேர் பலம் அர்ஜூணனை அழைத்து கொண்டு ஒரு காரில் ஆந்திரா நோக்கி புறப்பட்டனர்.

அந்த கார் இன்று அதிகாலை விழுப்புரம் ஜானகிபுரம் பகுதியில் உள்ள சென்னை -திருச்சி தேசிய நெடுஞ்சாலையில் வந்து கொண்டிருந்தது.

அப்போது பலம் அர்ஜூணன் கழிவறைக்கு செல்ல வேண்டும் என போலீசாரிடம் கூறினார்.

உடனே காரை சாலையோரமாக போலீசார் நிறுத்தினர். பின்னர் பலம் அர்ஜூணனை காரில் இருந்து இறக்கி கை விலங்கையும் கழற்றி விட்டனர்.

கழிவறைக்கு சென்ற பலம் அர்ஜூணன் அங்கிருந்து தப்பி ஓடி விட்டார். நீண்ட நேரமாகியும் அவர் திரும்பி வரவில்லை. இதில் சந்தேகம் அடைந்த போலீசார் அங்கு சென்று பார்த்த போது பலம் அர்ஜூணனை காணவில்லை. அவரை அந்த பகுதியில் உள்ள பல்வேறு இடங்களில் போலீசார் தேடி பார்த்தனர். ஆனால் அவரை கண்டுபிடிக்க முடியவில்லை.

பின்னர் இது குறித்து விழுப்புரம் தாலுகா போலீசில் புகார் செய்தனர். அதன் பேரில் இன்ஸ்பெக்டர் ராஜன் வழக்கு பதிவு செய்து தப்பி ஓடிய கைதி பலம் அர்ஜூணனை வலை வீசி தேடி வருகின்றனர்.

ராமநாதபுரம்:

ராமநாதபுரம் மாவட்டம் ஆர்.எஸ். மங்கலம் அருகே சனவெளி கிராமத்தைச்சேர்ந்த பூசாரி சிவசங்கர பாண்டியன். இவர் வீட்டில் இல்லாதபோது பூட்டை உடைத்து 13 பவுன் நகை, 2 ஜோடி கொலுசு, 1,000 ரூபாய் ரொக்கம் திருட்டுப்போனது.

இது தொடர்பாக சென்னை வியாசர்பாடியைச் சேர்ந்த சுப்பிரமணியன் மகன் சந்தோஷ்குமார் (வயது28) என்பவரை ஆர்.எஸ். மங்கலம் போலீசார் கைது செய்தனர்.

உடல்நிலை பாதிக்கப்பட்ட நிலையில் இருந்த அவரை போலீசார் சிகிச்சைக்காக ராமநாதபுரம் அரசு ஆஸ்பத்திரியில் சேர்த்தனர்.

இந்த நிலையில் பாதுகாப்புக்கு இருந்த போலீசாருக்கு டிமிக்கி கொடுத்துவிட்டு சந்தோஷ் குமார் தப்பியோடி தலைமறைவானார். போலீசார் தீவிரமாக அவரை தேடி வருகின்றனர்.

இந்த சம்பவம் குறித்து மாவட்ட போலீஸ் சூப்பிரண்டு ஓம்பிரகாஷ் மீனா கூறுகையில், வீடு புகுந்து திருடிய சந்தோஷ்குமார் தப்பி ஓடும்போது சனவெளி கண்மாய் அருகே அடையாளம் தெரியாத 10 பேர் பிடித்து தாக்கி உள்ளனர். இதில் அவன் பலத்த காயம் அடைந்ததால் அரசு ஆஸ்பத்திரியில் சேர்க்கப்பட்டான். அங்கு பாதுகாப்புக்கு 4 போலீசார் காவலில் இருந்தனர்.

அவர்களிடம் கழிவறை செல்வதாக கூறிச் சென்ற சந்தோஷ்குமார், அங்கிருந்த ஜன்னல் வழியாக தப்பி ஓடி உள்ளான். அவனை பிடிக்க திருவாடானை போலீஸ் துணை சூப்பிரண்டு விஜயகுமார் தலைமையில் தனிப்படை அமைக்கப்பட்டுள்ளது.

காவல் பணியில் கவனக்குறைவாக இருந்த 4 போலீசார் மீது நடவடிக்கை எடுக்கப்படும் என்றார்.

பெரும்பாறை:

தேனியை சேர்ந்தவர் பொன்ராஜ்(வயது47). இவர் கொடைக்கானல் மலைப்பகுதியில் பல்வேறு இடங்களில் திருடி வந்தார். தாண்டிக்குடி போலீசார் கடந்த 2 மாதங்களுக்கு முன்பு கைது செய்தனர். கொடைக்கானல் கோர்ட்டில் ஆஜர்படுத்தப்பட்டு திண்டுக்கல் சிறையில் அடைத்தனர்.

நேற்று கொடைக்கானல் கோர்ட்டில் ஆஜர்படுத்துவதற்காக போலீசார் பாண்டி, சங்கீதாமணி ஆகியோர் அழைத்து வந்திருந்தனர். கோர்ட்டில் ஆஜர்படுத்திவிட்டு வத்தலக்குண்டு வந்தபோது பொன்ராஜ் தனது மனைவியை பார்க்கவேண்டும் என கூறியுள்ளார்.

அதன்படி போலீசாரிடமிருந்த செல்போனை வாங்கி தனது மனைவிக்கு போன் செய்தார். சிறிதுநேரத்தில் தனது மனைவி வர உள்ளதாகவும், அவரை பார்த்துவிட்டு செல்லலாம் என வத்தலக்குண்டு பஸ்நிலையம் அருகே காத்திருந்தனர். அப்போது அவருக்கு கைவிலங்கு மாட்டப்படவில்லை.

திடீரென போலீசார் கண்ணில் மண்ணைதூவிவிட்டு பொன்ராஜ் மறைந்துவிட்டார். அக்கம்பக்கம் பல இடங்களில் தேடியும் கிடைக்காததால் அவர்கள் அதிர்ச்சி அடைந்தனர். பின்னர். இதுகுறித்து தாண்டிக்குடி போலீசில் புகார் அளித்தனர்.

போலீசார் தப்பி ஓடிய பொன்ராஜை தேடி வருகின்றனர்.

கோவை:

சேலம் மாவட்டம் ஆத்தூரை சேர்ந்தவர் பழனியப்பன். இவரது மகன் செல்வம் (வயது 30). இவரது மனைவி சிவகாமி. இவர்களுக்கு ஒரு குழந்தை உள்ளது.

செல்வம் அடிதடி வழக்கில் கைது செய்யப்பட்டு கடந்த 3 மாதங்களுக்கு முன்பு கோவை மத்திய சிறையில் அடைக்கப்பட்டார்.

ஜெயிலில் இருந்த இவர் கடந்த 6-ந் தேதி கொசு மருந்தை குடித்து தற்கொலைக்கு முயன்றார். இதனை பார்த்த சிறை அதிகாரிகள் அவரை மீட்டு அரசு ஆஸ்பத்திரியில் உள்ள ஜெயில் கைதிகள் வார்டில் சேர்த்து சிகிச்சை அளித்து வந்தனர்.

அங்கு இருந்த செல்வம் மீண்டும் கையை அறுத்து தற்கொலை செய்ய முயன்றார். இதனையடுத்து அவரை ஆஸ்பத்திரியில் உள்ள தீவிர சிகிச்சை பிரிவில் சேர்த்தனர். அங்கு வைத்து அவருக்கு கடந்த 2 நாட்களாக டாக்டர்கள் சிகிச்சை அளித்து வந்தனர்.

தீவிர சிகிச்சை பிரிவில் அனுமதிக்கப்பட்டு சிகிச்சை பெற்று வந்த செல்வத்துக்கு பாதுகாப்பாக சரவணகுமார் என்ற போலீஸ்காரர் இருந்தார். இன்று அதிகாலை 5 மணியளவில் போலீஸ்காரரிடம் செல்வம் கழிவறைக்கு செல்வ வேண்டும் என்று கூறினார்.

இதனையடுத்து போலீஸ்காரர் சரவணகுமார் கழிவறை செல்ல செல்வத்தை அனுமதித்தார். செல்வம் கழிவறைக்கு சென்று 15 நிமிடங்கள் ஆகியும் அவர் திரும்பிவரவில்லை.

இதனால் போலீஸ்காரர் கழிவறை கதவை தட்டினார். ஆனால் கதவை செல்வம் திறக்கவில்லை. இதனால் சந்தேகம் அடைந்த போலீஸ்காரர் கதவை உடைத்து கழிவறைக்கு சென்று பார்த்தார்.

அப்போது கழிவறையில் செல்வம் இல்லை. கழிவறைக்கு சென்ற செல்வம் அங்கு இருந்த ஜன்னலை உடைத்து தப்பிச் சென்றது தெரிய வந்தது.

அதிர்ச்சியடைந்த போலீஸ்காரர் சரவணகுமார் இது குறித்து சிறை அதிகாரிகளுக்கு தகவல் தெரிவித்தார். சிறை அதிகாரிகள் இது குறித்து ரேஸ்கோர்ஸ் போலீசில் புகார் செய்தனர். ரேஸ்கோர்ஸ் போலீசார் வழக்குப்பதிவு செய்து தப்பி ஓடிய சிறைக்கைதி செல்வத்தை தேடி வருகிறார்கள்.

ஆஸ்பத்திரியில் சிகிச்சை பெற்று வந்த சிறைக்கைதி போலீஸ்காரரை ஏமாற்றி தப்பிச் சென்ற சம்பவம் அங்கு பரபரப்பை ஏற்படுத்தியது. #tamilnews